Վարժություններ հոգնած աչքերի համար

Եթե համակարգչի առջև երկարատև աշխատանքի պատճառով աչքերն սկսում են ցավել, ապա այս պարզ վարժությունները կօգնեն հանգստանալ և կանխել տեսողության վատացումը։ Կատարեք վարժություններն առանց տեղից վեր կենալու։

1. Հենվեք աթոռի թիկնակին և խորը շունչ քաշեք, խոնարհվեք առաջ և արտաշնչեք։ Կրկնեք 5-6 անգամ։ Այնուհետև հենվեք աթոռի թիկնակին և փակեք կոպերը, ուժգին սեղմեք և բացեք աչքերը։ Կրկնեք 5-6 անգամ։

2. Կատարեք այս վարժությունը դանդաղ՝ գլուխն անշարժ պահելով։ Նայեք վերև-ներքև, աջ-ձախ։ Շրջապտույտ արեք սկզբում ժամսլաքի ուղղությամբ, հետո՝ հակառակ ուղղությամբ։ Այնուհետև հերթականությամբ շարժելով աչքերը հակառակ ուղղություններով՝ նկարեք քառակուսի, եռանկյուն և անվերջության նշան (պառկած 8): Այս վարժության ընթացքում առաջացած լարվածությունը նույնքան բնական է, որքան ոտքերի լարվածությունը վազքից հետո։

3. 2-3 վայրկյան նայեք ուղիղ ձեր առջև հեռավոր կետի։ Այնուհետև հայացքը կենտրոնացրեք քթի ծայրին։ 3-5 վայրկյան սպասեք այդ դիրքում։ կրկնեք 2-3 անգամ։

4. Փակեք աչքերը և մեկ րոպե շարունակ մատների ծայրերով մերսեք կոպերը, փորձեք չձգել մաշկը։

5. Պալմինգ, սա յոգայի շավասանայի նման մի բան է։ Այն ոչ միայն թուլացնում է աչքերի մկանները, այլև հանգստացնում է նյարդային համակարգը։ Արմունկները դրեք սեղանին, մի ափը դրեք մյուսի մեջ այնպես, որ ուղիղ անկյուն կազմեն (x)։ Ափերն այդ դիրքով ամուր սեղմեք աչքերին՝ յուրաքանչյուր ափը մեկ աչքին, այնպես, որ լույս չթափանցի։ փակեք կոպերը և այդ դիրքում մնացեք 5 րոպե։ Թուլացրեք պարանոցի, ուսերի, մեջքի մկանները, շնչեք դանդաղ և խորը, կենտրոնացեք շնչառության վրա, զգացեք, թե ինչպես է օդը մտնում մարմնի մեջ և դուրս գալիս։